അമിതമായ കാപ്പി ഉപയോഗം ഗുരുതര പ്രത്യാഘാതങ്ങള്‍ക്ക് കാരണമാകും
നിങ്ങളുടെ ഒരു ദിവസം ആരംഭിക്കുന്നത് കാപ്പിയില്‍ നിന്നാണോ ?നിങ്ങള്‍ ഒരു കാപ്പി പ്രേമിയാണോ ? ഒരു ദിവസം എത്ര തവണ കാപ്പി കുടിക്കും ? ഈ ചോദ്യങ്ങള്‍ക്കുള്ള ഉത്തരം അതെ എന്നാണെങ്കില്‍, നിങ്ങള്‍ അറിഞ്ഞിരിക്കേണ്ട ചില കാര്യങ്ങളുണ്ട്. അമിതമായി കാപ്പി കുടിക്കുന്നത് വഴി ശരീരത്തിലെത്തുന്ന കഫൈനാണ് ആരോഗ്യ പ്രശ്‌നങ്ങള്‍ സൃഷ്ടിക്കുന്നത്. എന്തൊക്കെയാണ് കഫൈന്‍ മൂലം ഉണ്ടാകുന്ന ആരോഗ്യ പ്രശ്‌നങ്ങളെന്ന് പരിശോധിക്കാം.
- കഫൈന്‍ അഡ്രീനല്‍ ഗ്രന്ഥികളെ ഉത്തേജിപ്പിക്കുകയും അത് അഡ്രിനാലിന്‍ പുറപ്പെടുവിക്കുകയും ശരീരത്തിന് ഊര്‍ജസ്വലതയും ജാഗ്രതയും നല്‍കുകയും ചെയ്യുന്നു, എന്നാല്‍ ഉത്കണ്ഠ കൂടുതലുള്ള ആളുകളുടെ നിലവിലുള്ള അവസ്ഥ കൂടുതല്‍ വഷളാക്കുകയും ആ വ്യക്തിയെ കൂടുതല്‍ പ്രകോപിപ്പിക്കുകയും ചെയ്യാം
- വര്‍ധിച്ച കഫൈന്‍ ഉപയോഗം ഉറക്കത്തെ പ്രതികൂലമായി ബാധിക്കുന്നു
- അമിതമായി കാപ്പി കുടി വയറുവേദന, ഓക്കാനം, ഛര്‍ദ്ദി, അസിഡിറ്റി എന്നിവയിലേക്കും നയിച്ചേക്കാം
- കഫൈന്‍റെ ദൈനംദിന ഉപയോഗം വര്‍ധിക്കുന്നത് ആസക്തിയിലേക്ക് നയിക്കുന്നു, പിന്നീട് കാപ്പി കുടിക്കുന്നതില്‍ നിന്ന് പിന്‍മാറുമ്പോള്‍ മാനസികമോ ശാരീരികമോ ആയ പിന്മാറല്‍ ലക്ഷണങ്ങളടക്കം കാണിക്കാം
- ഉയര്‍ന്ന അളവില്‍ കഴിക്കുമ്പോള്‍ കഫൈന്‍ രക്തസമ്മര്‍ദ്ദവും ഹൃദയമിടിപ്പും വര്‍ധിക്കുന്നതിന് കാരണമാകാം
- ഗര്‍ഭാവസ്ഥയില്‍ ഉയര്‍ന്ന അളവിലുള്ള കഫൈന്‍ ഉപയോഗം ഗര്‍ഭം അലസല്‍, മാസം തികയാതയെുള്ള പ്രസവം തുടങ്ങിയവയ്ക്കുള്ള സാധ്യത വര്‍ധിപ്പിക്കുന്നു
- മൂത്രത്തില്‍ കാല്‍സ്യ വിസര്‍ജ്ജനം വര്‍ദ്ധിപ്പിക്കും, ഇത്എല്ലുകളെ ദുര്‍ബലപ്പെടുത്തും.
